Wok bilong Jisas – Sin (3)
Mark 9:42-48.
Sin Em i bikpela samting o liklik samting?
Taim mi stap long wanpela ples bilong PNG mi lukim sampela samting. Mi lukim pasin we ol sampela lotu manmeri ol i skelim ol trabel sin bilong ol i ken i kamapim, na ol i tingim olsem, “Em i orait, samting mi laik wokim mi ken i wokim, na hevi bilong sin bilong mi bai i stap liklik taim tasol, na bihain ol manmeri bai wanbel gen na mi ken i stap long lotu bilong mi.”
Em olsem na mi lukim wanpela marit man i laik kisim nupela meri. Em i skelim na tingim olsem, “Mi save, sapos mi kisim nupela meri, orait misineri bilong mi bai rausim mi long lotu na mi stap autsait liklik taim. Bihain mi bai giaman na tok sori na misineri wantaim ol lotu manmeri ol bai lukim sori bilong mi na ol bai wanbel long mi na kisim bek mi.” Orait na em i skelim samting olsem na long dispela rot em i kisim nupela meri. Yu save, em i tingim olsem ol dispela sin bilong em i no bikpela samting.
Na yu tingim sin i bikpela samting o nogat?
Long stadi namba 6 mi bin stori long wanpela draiva. Em save draivim wanpela olpela ka i bagarap tumas. Ol taia i smok, na em i no stretim ol bagarap bilong ka bilong em, na em i no baim rejo (yu save, rejo em i makim ol ka i seif long yu kalap long em na yu raun). Na draiva i tingim olsem, ol dispela samting i liklik samting tumas. Olsem na em save kisim ka bilong em raun long rot.
Tasol ol polis ol i no tingim olsem ol dispela samting i liklik samting. Nogat. Ol i holim draiva na kotim em na kot i kalabusim em.
Ol narapela draiva bilong ol ka nogut ol i harim stori bilong draiva, tasol ol i no lusim olpela ka bilong ol. Nogat. Ol i raun yet long haiwe rot na ol i tingim olsem, “Polis i no inap holim mi, na sapos ol i holim mi, em i orait, bai mi grisim ol na ol i no inap kotim mi na kalabusim mi.”
Na wankain olsem, yumi manmeri bilong dispela graun yumi tingim olsem, “Sin em i no bikpela samting, na sapos God i kotim mi, em i orait, bai mi grisim Em na Em i no inap mekim save long mi.”
Na kastem pasin bilong PNG i save strongim dispela kain tingting. Yu save, taim wanpela man i wokim rong, orait ol klen bilong em ol i ken i kam sapotim na difenim em. Na sapos kot i makim kot fain bilong rong bilong em, orait ol klen i save bungim mani bilong baim kot fain. Long dispela pasin man i wokim rong em i no kisim hevi bilong rong bilong em.
Na yu save, sampela taim korapsen i stap long kot sistem, na long rot bilong korapsen ol sampela manmeri i wokim rong ol i ken i abrusim pe bilong rong bilong ol.
Ol dispela kain pasin i kamapim tingting olsem, sin i no bikpela samting na i gat rot bilong abrusim hevi bilong en.
Na wanwan taim long ples, taim wanpela man i wokim rong, orait ol i tokim ol manmeri long tokples olsem, “Yu no ken i tokim Glenn.” Yu save, ol i laik haitim rong bilong ol long ai bilong mi. Na em olsem wanem? Ol i no tingting planti long rong bilong ol, a? Ol i tingting planti tasol long tingting bilong Glenn, a? Sapos Glenn i no save long rong bilong ol, orait rong bilong ol i ken i stap liklik samting, a? Ol i tingim olsem, sapos Glenn i no save long rong bilong ol, orait ol i no inap lukim pe bilong rong bilong ol, a?
Harim. Tingting bilong mi em i samting nating. Mi tingim sin i bikpela samting o mi tingim sin i liklik samting, orait dispela em i samting nating. Tasol sapos God i tok, sin em i bikpela samting, orait yumi mas harim dispela tok na yumi mas save olsem, sin em i bikpela samting.
Jisas i tok, sin em i bikpela samting stret.
Harim tok bilong Jisas long Mak 9:42-48.
- Ples hel em i ples nogut nogut olgeta. Em olsem na sapos yu mekim wanpela manmeri i bilip long Jisas i pundaun insait long sin pasin, orait mobeta ol i kisim rop na pasim bikpela ston long nek bilong yu na tromoi yu long solwara. Long wanem, yu dringim solwara i winim yu yet i lus long ples hel. Lukim lain 42 wantaim lain 48.
Tingim. Sapos yu grisim wanpela man i bilip long Jisas i go mekim sampela kain rong wantaim yu, em nau, yu mekim em i pundaun insait long sin pasin. Em olsem na mobeta yu dringim solwara, bai yu no ken i mekim dispela sin.
- Na sapos han bilong yu i mekim yu pundaun insait long wanpela sin pasin, orait mobeta yu katim na rausim han bilong yu olgeta. Long wanem, yu lusim han bilong yu i winim yu yet i lus long ples hel. Lukim lain 43 wantaim lain 48.
Tingim. Sapos yu sindaun pilai kads na westim mani bilong femili bilong yu, em nau, yu yusim han bilong yu bilong mekim sin pasin. Em olsem na mobeta yu katim na rausim han bilong yu, bai yu no ken i mekim dispela sin.
- Na wankain olsem long lek bilong yu. Sapos lek bilong yu i mekim yu pundaun insait long wanpela sin pasin, orait mobeta yu katim na rausim lek bilong yu. Long wanem, yu lusim lek bilong yu i winim yu yet i lus long ples hel. Lukim lain 45 wantaim lain 48.
Tingim. Sapos yu wokabaut i go long haus bilong wanpela man bilong mekim trabel long em, em nau, yu yusim lek bilong yu bilong mekim sin. Em olsem na mobeta yu katim na rausim lek bilong yu, bai yu no ken i mekim dispela sin.
- Yumi pret long lusim ai bilong yumi. Tasol Jisas i tok olsem, sapos ai bilong yu i mekim yu pundaun insait long sin pasin, orait mobeta yu kamautim ai bilong yu. Long wanem, yu lusim ai bilong yu i winim yu yet i lus long hel. Lukim lain 47 wantaim lain 48.
Tingim. Sapos yu aigris long ol meri o long ol man, orait yu yusim ai bilong yu bilong mekim sin. Em olsem na mobeta yu kamautim ai bilong yu, bai yu no ken i mekim dispela sin.
Jisas i save olsem, sin em i wanpela bikpela bikpela samting stret. Em olsem na Jisas i tok, mobeta yumi dring solwara, na katim na rausim han na lek bilong yumi, na kamautim ai bilong yumi, bilong stopim yumi long mekim sin na lukim ples hel.
Ples hel em i ples nogut nogut olgeta. Na yumi mas klia olsem, Jisas Em i God na Em i bin wokim olgeta samting na Em i bin wokim ples hel. Em olsem na Em i save long ples hel. Sin em i rot bilong manmeri i kamap long ples hel. Long dispela as Jisas i givim bikpela woning long yumi manmeri bilong dispela graun.
Tok bilong Jisas i ken i pretim yumi.
Dispela graun yumi i stap long em, em i no bilong yumi. Nogat. Dispela graun em bilong God. Em bilong Jisas. Yumi no fri long raun long laik na save bilong yumi yet. Nogat. Yumi mas raun long laik na save bilong God tasol. Na tu, yumi no oana na bos bilong yumi yet. Nogat. God i wokim yumi na long dispela as God Em i oana na bos bilong yumi, na long dispela as yumi mas bihainim Em.
Jisas Em i king na Em i oana na bos bilong laip bilong yumi. Em olsem na yumi no ken i givim baksait moa long Jisas. Yumi no ken i pulim nus moa long Jisas. Mobeta yumi tingim na yumi lusim laik na save bilong yumi yet na yumi i stap aninit long King Jisas na bihainim Em na trastim God long kisim bek yumi long feitful baim bek wok bilong Jisas long diwai kros.
Na sapos yu no laik tingim King Jisas na bihainim Em, orait yu tingim ples hel na yu pret na yu tanim bel na yu kam i stap aninit long King Jisas. Long wanem, ples hel em i trupela ples i stap na em i ples nogut nogut olgeta.
Tok bilong Jisas em i trupela tok.
Mak em i stori long wanpela trupela man, nem bilong em Jisas, na Jisas Em i God i kam daun long dispela graun. Na i gat ol ai witnis i stap bilong sapotim na konfemim dispela trupela samting. Na taim Jisas i tok, orait Em i God na Em i tok, na dispela i minim olsem, olgeta tok bilong Em i tru olgeta. Na ol tok Jisas i mekim ol ai witnis i harim na ol i raitim na yumi ken i luksave na klia long tok bilong Jisas, tok bilong God.
Ol tumbuna bilong yupela ol i no raitim wanpela samting. Nogat. Toktok bilong ol i kam long yumi olsem ol tok win. Na yu save long pasin bilong tok win. Taim tok win i kamap long yumi, orait toktok i ken i senis na kamap narapela kain tok olgeta. Tok bilong Jisas i no olsem. Nogat. Ol ai witnis i harim na ol i raitim na God i lukautim dispela raitim i kam i kam na i stap nau long han bilong yumi.
Jisas Em i soim yumi olsem, tru Em i God. Em i no toktok tasol. Nogat. Em i soim yumi. Em i opim ai bilong aipas manmeri, na em i opim ia bilong iapas manmeri, na em i opim maus bilong mauspas manmeri, na em i stretim lek bilong ol lek nogut manmeri. Em i wokabaut antap long wara. Em i mekim win na solwara i stap isi. Em i kirapim manmeri i dai pinis. Hamas moa evidens bai yu nidim na yu bilipim na trastim na bihainim Jisas? Jisas i givim planti evidens na em inap long yumi bilipim na trastim na bihainim Jisas.
Yumi mas bilipim na trastim tok bilong Jisas.
Taim Jisas i tok olsem, sin em i bikpela bikpela samting, orait yumi mas bilipim na trastim tok bilong Em. Jisas i bin wokim ples hel, olsem na, Em i save long dispela ples, na taim Em i givim woning long yumi, mobeta olgeta yumi harim tok bilong Em. Taim Jisas i tok, katim han na katim lek na kamautim ai, orait Em i mekim strongpela toktok bilong soim yumi olsem, sin Em i bikpela bikpela samting na yumi no ken i tingim olsem sin em i liklik samting. Yumi no inap katim han lek bilong yumi na kamautim ai bilong yumi bai yumi stap orait. Nogat. Jisas i mekim tok tasol bilong soim yumi olsem, sin em i bikpela bikpela samting na yumi no ken i tingim olsem sin em i liklilk samting.
Na dispela tok i pretim yu, a? Harim. Tru tumas, sin em i no liklik samting. Nogat. Em i bikpela bikpela samting stret. Na ples hel em i ples nogut nogut olgeta.
Long PNG yumi gat ol femili i stap na yumi gat ol wantok i stap bilong sapotim yumi na toktok planti, bai yumi abrusim pe bilong ol trabel yumi mekim. Na yumi tingim olsem yumi ken i grisim God na abrusim pe bilong sin bilong yumi olsem yumi mekim long ol Viles Kot. Tasol nogat. Sin em i bikpela bikpela samting tumas long tingting bilong God. Tru tumas, i no gat wanpela samting yu ken i wokim na mekim na bai yu abrusim kot na pe bilong sin bilong yu.
Gutnius bilong Jisas.
Sin em i bikpela bikpela samting tumas long yumi, na long dispela as God yet i kam daun bilong mekim wok long sin. Long dispela as Jisas i kam bilong lusim laip bilong Em bilong baim bek laip bilong yumi sin manmeri.
Yumi stap long bikpela trabel, long wanem, yumi sin manmeri pinis. Tasol Jisas i kisim pe bilong sin na Em i lusim laip bilong Em. Jisas i mekim olsem bilong baim bek laip bilong sin manmeri. Em olsem na, sapos yumi lusim rot bilong yumi yet na yumi bilipim na trastim God long kisim bek yumi long feitful baim bek wok bilong Jisas, orait yumi no inap lukim ples hel, nogat, bai yumi lukim laip wantaim God long heven.
Jisas Em i husat? Jisas Em i God i kam daun long dispela graun. Long wanem as Jisas i kam? Em i kam bilong lusim laip bilong Em yet bilong baim bek laip bilong yumi manmeri nogut. Sin em i bikpela bikpela samting tru na long dispela as yumi nidim Jisas i mekim wok bilong baim bek yumi. Em i lusim stretpela laip bilong Em yet bilong baim bek laip bilong yumi manmeri nogut. Olsem na, yu lusim rot bilong yu na yu kam long Jisas na bilipim na trastim Jisas long baim bek yu. Bilipim na trastim God long kisim bek yu long feitful baim bek wok bilong Jisas long diwai kros.
Na sapos yu givim baksait long feitful baim bek wok bilong Jisas, orait husat bai baim bek laip bilong yu? Sori tumas, yu bai lusim laip bilong yu yet long ples hel.
Tasol, sapos yu kam pinis long Jisas na yu bilipim na trastim feitful baim bek wok bilong Em pinis, na yu trastim God long kisim bek yu long feitful baim bek wok bilong Jisas, orait yu ken i save olsem olgeta promis bilong Jisas i tru i tru olgeta na ol i bilong yu. Tru tumas, Jisas i kam bilong lusim laip bilong Em bilong baim bek laip bilong yu. Olsem na yu ken i amamas na yu ken i tok tenkyu long God.
Sin em i bikpela bikpela samting. Tasol baim bek wok bilong Jisas em i bikpela bikpela samting. Em olsem na, yu pas long Jisas nau – nogut yu tuleit.
Em tasol.
